地下鐵老師

我成日唔明，地下鐵的一眾公關大員是否從幼稚園老師轉職過來。我完全尊重幼稚園老師的工作，只是所有從事「前線工作」的打工仔都應該明白見人講人話，見鬼講鬼話的道理。正如我們的萬世師表孔子，幾千年前便知道對著一個衝動魯莽的學生，便要教佢用下個腦問下人意見先 take action；而對住個一日到黑驚呢樣驚果樣既子弟，就要叫佢唔該你收埋個腦，想做就去做。可是港鐵的宣傳部卻好似永遠同人民唔o岩咀型，成日都唔知自己D乘客係咩人。

早前係另一篇文章中，小弟提過港鐵曾經發神經以為地下鐵是保母車，用教小孩子的口吻叫乘客「Please remember, No eating or drinking on MTR trains」，最終被一班英文專家群起攻之才死死地氣改正過來，想不到地鐵現在又重施故技，當乘客係三歲細路哥般氹，一句唔好意思就諗住可以解決他們和人民的階級矛盾。喂，我唔老黎你港鐵唔係因為你一日到黑係我門口左掘右掘，而係掘完後唔單只無方便到（亦更加唔會令我變成一個律師或醫生），而係你未開始掘我間屋便因為「地鐵慨念」而加租得快過火箭。一朝起身落樓，成條街都鋪天蓋地掛滿紅色勁興奮田生橫額，仲以為屋企條樓梯係時光機，帶左我番去民革時代。驚魂未定，上樓打開電視想睇下「真情」定下神，點知見到有個玲瓏浮凸無咩衫著的鬼妹係個水池邊典來典去，然後又有個貌似 Jude Law 的物體一身西裝係度曬月光，而這個位於康城首都威尼斯西半山的地方竟然就係我樓下個街市。喂，你無野麻？唔好意思？

不要同我肉麻當有趣啦唔該，昨日報紙話香港貧窮人士的定義是月入小於三千多元。其實，一個月三千元未必唔足夠一個無妻兒仔女的人花，不過如果計埋屋租既話三千元隨時變佐得番幾百蚊。你地鐵再加價我大不了繼續搭巴士小巴渡海小輪，不過為了起呢樣起果樣，中環碼頭已經俾政府搬佐去山卡啦，而家灣仔碼頭又話要搬，搞到連紅磡碼頭都話要關門大吉。以後或者要學廣告D鬼妹咁係水邊訓起度就可以當飯食。

地鐵先生，你可以話我短視，但我真係唔明白，為什麼你而家搞到我家無寧日、家不成家、無船可搭，因此二十年後我就會變成一位揸波子又唔駛搭地鐵的律師／醫生／經理。而我更加唔明白，現在揸波子又唔駛搭地鐵的律師／醫生／經理的四／五／六十後為何會是你的宣傳對象。我認為，港鐵的最大問題係佢地唔知從幾時開始出現佐一種「家長」心態，從服務市民變成了照顧市民，到最後以為自己可以教導全港市民咩野係好，咩野係壞。但事實卻正向相反方向發展，地鐵自從上市到食埋九鐵後，很多的決策便從服務市民變成向股東負責，尋求最大的利潤。讓人懷疑他們建鐵路的目的是為了搞地產、霸土地而多過為佐方便現正住係度既居民。

平心而論，港鐵的營運水準確實不差，特別是同其他歐洲大城市如巴黎倫敦相比之下，港鐵的乾淨程度簡直有如醫院。（雖則人地既地鐵系統有成百幾年歷史，有D野想改進都唔係咁易，好似之前話要係車廂裝冷氣但係搵極都搵唔倒位，最後要諗埋D係凳底放舊冰甚至係車頂嘖香水的騎呢主意）港鐵，我只係希望他地唔好再搞咁多野，正所謂悶聲發大財，收下把口啦唔好意思。